15 студзеня бягучага года ў рамках мерапрыемстваў, прысвечаных 75-годдзю Ганцавіцкага раёна, кіраўніцтва райвыканкама і дэлегацыя з Рэспублікі Малдова наведалі ўстановы і арганізацыі раёна, у тым ліку і раённы цэнтр дзіцячай і юнацкай творчасці.
Традыцыйна, хлебам соллю, шчырым словам і добрымі песнямі, сустрэлі гасцей у Цэнтры творчасці, затым пазнаёмілі з яго работай праз наведванне заняткаў. У нязмушанай абстаноўцы вялася гаворка, у ходзе якой адзін і другі бок дзяліліся сваім вопытам, творчымі набыткамі і дасягненнямі.
Фінальным акордам наведвання ўстановы стала літаратурна-музычная кампазіцыя узорнага літаратурнага аб’яднання “Верасок” “Жыві доўга, матуля, мая…”, напрыканцы якой атрымалі госці ў якасці памятнага падарунка вершаваныя зборнікі юных паэтаў і сувеніры, зробленыя рукамі руплівых дзяцей і іх педагогаў.
На развітанне быў зроблены фотаздымак, які стане добрым напамінам аб незабыўнай сустрэчы і значнай падзеі ў раёне.