Цэнтральная раённая бібліятэка імя В.Ф.Праскурава прэзентавала сваім чытачам дзве новыя кнігі Ларысы Геніюш “Лісты з Зэльвы” і Зоські Верас “Я помню ўсё”. Удзел у мерапрыемстве прымалі літаратары-землякі Аляксей Галаскок, Ала Мірзаліева, Святлана Локтыш, Ніна Таўтын, а таксама чалавек, дзякуючы якому кнігі ўбачылі  свет, укладальнік абодвух выданняў, пісьменнік Міхась Скобла. На Свята ў бібліятэку завіталі і ўдзельнікі ўзорнага літаратурнага аб’яднання “Верасок” РЦДТ. Кіраўніца літаратурнай суполкі Галіна Пупач падзялілася сваімі ўражаннямі ад паездкі ў Львоў, дзе ладзіліся Дні беларускай і шведскай літаратуры. Яна расказала аб святах і буднях вераскоўцаў, іх творчасці і літаратурных здабытках. А Яўгенія Пракапчук прачытала свае вершы, якія ўпадабала душа і сэрца не толькі дзяўчынкі, але і прыхільніукаў яе творчасці. На памяць аб сустрэчы з новымі кнігамі і пісьменнікам Міхасём Скоблай застанецца  адно з выданняў, кніга Зоські Верас “Я помню ўсё” і аўтограф “Галіне Мікалаеўне і таленавітым вераскоўцам – Верасовы ўзятак на духоўны спажытак. Каб гартаваліся  на вогнішчы духу аўтаркі гэтай кнігі і былі сапраўднымі беларусамі. Міхась Скобла”.