Яна Грыбоўская, Маргарыта Бараноўская і Віялета Гарадзецкая вучацца ў 5 “Б” класе гімназіі нашага горада. Дзяўчынак аб’ядноўвае не толькі вучоба. Яны любяць спяваць, рабіць сваімі рукамі самыя розныя рэчы, прыгожа танцуюць, а таксама гуляюць у валейбол. А яшчэ Яна, Маргарыта і Віялета — удзельніцы ўзорнага літаратурнага аб’яднання “Верасок” РЦДЮТ. Дзяўчынкі спрабуюць свае сілы ў напісанні невялічкіх замалёвак, вершаў, удзельнічаюць у паэтычных імпрэзах, творчых конкурсах.

У снежні Яна Грыбоўская і Віялета Гарадзецкая будуць прадстаўляць наш “Верасок” на абласным творчым конкурсе “Брэсцкі рупар”.

Галіна ПУПАЧ, кіраўнік узорнага літаратурнага аб’яднання “Верасок” РЦДЮТ.

Злева направа: Яна Грыбоўская, Маргарыта Бараноўская і Віялета Гарадзецкая.

Фота аўтара.

*****

Малітва

Я малюся Богу за здароўе маці,

Каб яна са мною шмат гадоў жыла,

Каб у нашай цёплай і ўтульнай хаце

Ахоўнікам-анёлам для ўсіх была.

Я малюся Богу за дабро і волю,

Не цяклі каб слёзы з-пад маіх павек.

Божа Усемагутны, зберажы ад болю,

І хай будзе доўгім чалавечы век.

Я малюся Богу за зямлю і неба,

За ўсмешку сонца, за рамонкаў пах.

Вы паверце, людзі, мне так мала трэба,

Каб расці шчаслівай, каб быў светлым шлях.

Віялета ГАРАДЗЕЦКАЯ.

*****

Маці

Слова першае

ў жыцці

Кажам “маці”.

Калі цяжка нам ісці —

Побач маці.

Калі холадна ў хаце —

Грэе маці.

Яе доўга мы не бачым —

Горка плачам.

Падарыла

нам жыццё —

Мы аддзячым.

Маргарыта БАРАНОЎСКАЯ.

*****

Мамачка ўсміхнецца —

Стане весялей.

Яе ўсмешка — сонца,

І нам з ёй цяплей.

Маці засумуе —

Будзе хмурным дзень,

І на яе твары

Ляжа шэры цень.

Матуля гаворыць —

Праўда ў словах тых.

Нават калі крыўдна,

Яна скажа ўслых.

Яна ГРЫБОЎСКАЯ.