З ЗАЛЫ СУДА
Ад бойкі да забойства —
адзін крок….
Правапарушэнні і злачынствы ў сферы сямейна-бытавых адносін, а таксама крадзяжы — самыя распаўсюджаныя супрацьпраўныя дзеянні, якія здзяйсняюцца грамадзянамі. І галоўная прычына, як правіла, адна — злоўжыванне спіртнымі напіткамі. Асобныя аматары кульнуць чарку гатовы сцягнуць усё, што трапляе пад руку, каб потым і спатоліць сваю смагу. А ў п’яным чадзе здольны на самыя ганебныя ўчынкі.
Гэта ў поўнай меры можна сказаць у адрас Алега П. з вёскі Кукава. У свае 27 гадоў ён паспеў стаць хранічным алкаголікам, атрымаць пакаранне за крадзёж і трапіць у калонію за нанясенне цяжкіх цялесных пашкоджанняў.
У сваім жыцці Алег П. сябе не абцяжарваў вучобай і работай. Маючы толькі агульную сярэднюю адукацыю, ён не вельмі імкнуўся рэалізаваць сябе і на працоўным полі дзейнасці — нідзе не працаваў, а перабіваўся выпадковымі заробкамі. Цяга да алкаголю, жаданне жыць не горш чым іншыя і пры гэтым не прыкладваць асаблівых намаганняў, мабыць, і штурхнулі яго на крадзёж, за які суд назначыў злодзею два гады папраўчых работ з выплатай 20 працэнтаў заробку ў даход дзяржавы. І можа быць прымусовая працатэрапія аказала б пэўны станоўчы ўплыў на паводзіны і лад жыцця Алега П., але калі яго крымінальная справа яшчэ не была нават перададзена ў суд, ён здзяйсняе яшчэ адно і значна больш цяжкае злачынства.
Напрыканцы ліпеня 2016 года Алег завітаў да свайго бацькі ў вёску Дубнякі. А пасля сумеснага распіцця спіртных напіткаў у іх узнікла сварка, у ходзе якой сын “адхадзіў” рукамі і качаргой бацьку, ды так, што той апынуўся ў бальніцы са зламанай рабрынай, пашкоджаннем лёгкага, пераломам рукі і шматлікімі кровападцёкамі. Добра, што бацьку на наступны дзень пасля бойкі знайшоў на ложку знаёмы, які выпадкова зайшоў у госці, і па просьбе мужчыны выклікаў хуткую дапамогу.
На судзе Алег П. поўнасцю прызнаў сябе вінаватым у тым, што біў бацьку, але выказаў і меркаванне, быццам, той мог атрымаць траўмы, калі падаў з веласіпеда. У гэтым выпадку вердыкт судмедэкспертаў быў адназначным — такія пашкоджанні немагчыма атрымаць пры падзенні з веласіпеда. Паказанні пацярпелага, а таксама сведкаў, якія на наступны дзень размаўлялі з ім і дапамагалі яму, сведчылі аб злачынстве Алега П.
У выніку, суд па сукупнасці злачынстваў шляхам частковага складання ўжо раней вызначанага пакарання за крадзёж і пакарання за нанясенне цяжкіх цялесных пашкоджанняў, вынес Алегу П. прысуд: пазбаўленне волі на 4 гады і 6 месяцаў у папраўчай калоніі ва ўмовах узмоцненага рэжыму. Акрамя гэтага яму назначана прымусовае лячэнне ад алкагалізму.
Прыгавор суда не ўступіў у законную сілу і можа быць абскарджаны.
У гэтым выпадку, як і ў многіх аналагічных, якія даводзіцца разглядаць на судовых пасяджэннях, усё закончылася яшчэ больш-менш добра. Бо ад цяжкіх цялесных пашкоджанняў, якія з’яўляюцца рэальнай пагрозай жыццю чалавека, да забойства застаецца літаральна адзін крок і часта толькі па шчаслівай выпадковасці ён не робіцца…
Сяргей НАСЕНЯ,
пракурор
Ганцавіцкага раёна.
СІТУАЦЫЯ
У адказе за сваіх гадаванцаў
У апошні час узнікае шмат пытанняў па парушэннях правілаў утрымання хатняй жывёлы. І варта адзначыць, што прадстаўнікі сельвыканкамаў і супрацоўнікі міліцыі даволі актыўна працуюць у гэтым накірунку. Гаспадары тых жа сабак, якія свабодна бадзяюцца па вёсках, ды яшчэ і без наморднікаў, прыцягваюцца да адміністрацыйнай адказнасці. Але часам узнікаюць спрэчныя сітуацыі, у якія работнікам пракуратуры даводзіцца ўносіць яснасць.
Так, жыхарка адной з вёсак раёна звярнулася ў міліцыю са скаргай на суседа, які на сваім двары ўтрымлівае сабаку. Ён па начах вельмі моцна брэша і не дае адпачываць. Супрацоўнік міліцыі выехаў на месца і не знайшоў парушэнняў у правілах утрымання жывёлы, якія рэгламентуюцца Пастановай Савета Міністраў Рэспублікі Беларусь № 834 ад 4 чэрвеня 2001 года. І толькі пасля таго, як жанчына звярнулася ў пракуратуру, яе праблема была вырашана.
Справа ў тым, што ўчастковым інспектарам не была дадзена ацэнка дзеянням гаспадара сабакі з боку гледжання іншых нарматыўна-прававых актаў, якія рэгламентуюць парадак карыстання жылымі памяшканнямі.
Так, згодна з пунктам 7.10 правілаў карыстання жылымі памяшканнямі, утрымання жылых і дапаможных памяшканняў, зацверджаных Пастановай Савета Міністраў Рэспублікі Беларусь № 399 ад 21 мая 2013 года, грамадзяне з 23.00 да 7.00 не павінны здзяйсняць дзеянні, якія ствараюць вібрацыю і шум (у тым ліку ігру на музычных інструментах, гучную размову і спевы, прымяненне піратэхнічных сродкаў, выкананне бытавых (рамонтных) работ, правядзенне ручных пагрузачна-разгрузачных работ, рэзкае закрыццё дзвярэй, утрыманне жывёлы і іншыя дзеянні).
Такім чынам, відавочна ўпушчэнне ў сваёй рабоце супрацоўнікам міліцыі і непрыняцце ім адпаведным мер уздзеяння на парушальніка. А менавіта ім і з’яўляецца гаспадар сабакі. Калі маеш хатнюю жывёлу, павінен несці за яе адказнасць.
У нас вельмі грунтоўная і даволі дакладная заканадаўчая база, варта толькі ёю граматна карыстацца.
Вадзім БАГАТКА,
намеснік пракурора
Ганцавіцкага раёна.